کراچی (ڈیلی پاکستان آن لائن) شہر قائد کے علاقے شاہ لطیف ٹاؤن میں ایک دلخراش واقعے نے سب کو ہلا کر رکھ دیا، جہاں 3 ماہ قبل اغواء ہونے والا معصوم بچہ حسین علی بھیک مانگتے ہوئے بازیاب کرا لیا گیا، پولیس نے بروقت کارروائی کرتے ہوئے مبینہ اغوا ءکار کو گرفتار کرلیا۔
5 مئی 2025 کو شاہ لطیف ٹاؤن سیکٹر 17-A سے 3 سالہ حسین علی کو اغواء کر لیا گیا تھا، بچے کے ورثاء کی جانب سے تھانہ شاہ لطیف ٹاؤن میں مقدمہ درج کرایا گیا۔
اغوا ءکے واقعہ کے بعد آج بعد نماز عشاء انوکھا موڑ اس وقت آیا جب مغوی بچے کا چچا نماز کی ادائیگی کے لیے مسجد گیا، مغوی کا چچا سیکٹر 16-A میں واقع فاروق اعظم مسجد پہنچا، مسجد کے گیٹ پر اس کی نظر ایک بھیک مانگتے بچے پر پڑی جو حیرت انگیز طور پر کچھ 3 ماہ پہلے اغوا ءہونے والا بچہ حسین علی نکلا۔بچے کے ساتھ موجود مشکوک شخص کو اہل علاقہ نے فوری طور پر دبوچ لیا اور پولیس کے حوالے کر دیا، گرفتار ملزم کی شناخت شہریار ولد مشتاق حسین کے نام سے ہوئی ہے۔
’’دنیا ٹی وی‘‘ کے مطابق ابتدائی تفتیش کے دوران ملزم شہریار نے انکشاف کیا کہ حسین علی کو اسے اس کے سسر سلطان نے دیا تھا ، آج علاقہ کی مقامی مسجد میں وہ اس سے بھیک منگوا رہا تھا، پولیس نے ملزم کو تھانہ شاہ لطیف ٹاؤن منتقل کرکے مزید تفتیش شروع کردی ہے۔