ڈھاکہ(ڈیلی پاکستان آن لائن)پاکستان اور بنگلہ دیش کے درمیان تین میچوں پر مشتمل ٹی20 سیریز کے پہلے میچ میں میزبان ٹیم نے شاندار کارکردگی کا مظاہرہ کرتے ہوئے پاکستان کو سات وکٹوں سے شکست دے دی۔ بنگلہ دیش نے 111 رنز کا ہدف صرف 15.3 اوورز میں حاصل کر کے میچ پر مکمل غلبہ حاصل کیا۔
پاکستان نے ٹاس جیت کر پہلے بیٹنگ کا فیصلہ کیا، جو جلد ہی غلط ثابت ہوا۔ پاکستانی بلے باز بنگلہ دیشی باؤلنگ کے سامنے بے بس نظر آئے۔ فخر زمان نے 44 رنز کی انفرادی اننگز کھیلی، لیکن ان کے سوا کوئی بھی بلے باز کریز پر نہ ٹھہر سکا۔ پوری ٹیم 110 رنز پر ڈھیر ہو گئی۔ تسکین احمد نے 3 وکٹیں حاصل کیں، جبکہ مستفیض الرحمٰن نے انتہائی کفایتی باؤلنگ کرتے ہوئے 4 اوورز میں صرف 6 رنز دے کر 2 کھلاڑیوں کو آؤٹ کیا۔جواب میں بنگلہ دیشی اوپنر پرویز حسین ایمان نے دھواں دھار بیٹنگ کا مظاہرہ کیا اور صرف 39 گیندوں پر ناقابلِ شکست 56 رنز بنائے، جس میں 5 چھکے اور 3 چوکے شامل تھے۔ ان کے ساتھ توحید ہریدوے نے 36 رنز کی اننگز کھیلی۔ بنگلہ دیش نے مطلوبہ ہدف 27 گیندیں قبل ہی حاصل کر لیا۔
پاکستانی باؤلنگ بھی غیر مؤثر رہی، سوائے سلمان مرزا کے جنہوں نے دو وکٹیں حاصل کیں۔ عباس آفریدی نے ایک کھلاڑی کو آؤٹ کیا۔پاکستانی ٹیم کی خراب بیٹنگ اور ناقص فیلڈنگ نے ایک بار پھر سوالات کو جنم دے دیا ہے، جبکہ بنگلہ دیش نے اپنے ہوم گراؤنڈ پر شاندار آغاز کیا ہے۔سیریز کا دوسرا میچ دو روز بعد کھیلا جائے گا، جہاں پاکستان کو واپسی کے لیے اپنی کارکردگی میں واضح بہتری لانا ہوگی۔