کراچی (ڈیلی پاکستان آن لائن) ماڈل و اداکارہ حرا ترین نے اداکارہ حمیرا اصغر علی اور سینئر اداکارہ عائشہ خان کی تنہائی میں اموات کے تناظر میں معاشرتی اور خاندانی نظام کے بکھرتے ڈھانچے پر کھل کر بات کی ہے۔
ڈان نیوز کے مطابق دونوں اداکاراؤں کی لاشیں ان کے گھروں سے کئی دن بعد ملیں، جنہیں حرا ترین نے انتہائی دل دہلا دینے والا قرار دیا۔
پولیس کے مطابق، حمیرا اصغر کی لاش کراچی کے ڈیفنس ہاؤسنگ اتھارٹی کے علاقے اتحاد کمرشل فیز سکس کے ایک فلیٹ سے منگل کے روز برآمد ہوئی۔
ڈپٹی انسپکٹر جنرل (ڈی آئی جی) جنوبی سید اسد رضا نے تصدیق کی ہے کہ اداکارہ کی لاش مذکورہ فلیٹ سے ملی۔
اب تک کی معلومات کے مطابق، تفتیشی افسران کا کہنا ہے کہ اداکارہ کی موت ممکنہ طور پر اکتوبر 2024 میں واقع ہوئی تھی۔
گزشتہ مہینے، 20 جون کو بھی اسی نوعیت کا واقعہ پیش آیا، جب سینئر اداکارہ عائشہ خان کی لاش کراچی کے گلشنِ اقبال کے ایک اپارٹمنٹ سے ملی تھی، شواہد سے معلوم ہوا کہ وہ تنہا رہتی تھیں اور ان کی موت چند روز قبل واقع ہوئی تھی۔
حرا ترین نے انسٹاگرام پر کی گئی ایک پوسٹ میں لکھا کہ وہ حمیرا سے ایک فیشن ویک کے دوران ملی تھیں، جب وہ ماڈلنگ کر رہی تھیں۔
انہوں نے لکھا کہ فیشن انڈسٹری میں بعض اوقات لوگ بہت ظالم ہوجاتے ہیں، لیکن آج کل جو کچھ ہو رہا ہے وہ دل توڑ دینے والا ہے، ایک ایسی حقیقت جس پر ہم بات ہی نہیں کرتے۔
انہوں نے مزید کہا کہ معاشرہ اور خاندان کا ڈھانچہ ہماری آنکھوں کے سامنے بکھر رہا ہے اور یہ سننا کہ کوئی شخص اپنے گھر میں تنہا انتقال کر جائے اور کئی دن بعد پتا چلے، یہ سب کچھ حد سے زیادہ پریشان کن ہے۔
حرا ترین نے لکھا کہ یہ اس بات کی علامت ہے کہ ہم ایک دوسرے سے کتنے لاتعلق ہو چکے ہیں، ہم یہ فرض کر لیتے ہیں کہ اگر کوئی سوشل میڈیا پر خوش نظر آ رہا ہے تو وہ حقیقی زندگی میں بھی ٹھیک ہوگا، حالانکہ اکثر لوگ سوشل میڈیا پر صرف اپنی بہترین جھلک دکھاتے ہیں۔
انہوں نے مزید لکھا کہ ہم ایک دوسرے سے گفتگو نہیں کرتے، بلکہ ان لوگوں کی طرف رجوع کرتے ہیں جو وہی کچھ کہتے ہیں جو ہم سننا چاہتے ہیں یا پھر مصنوعی ذہانت (اے آئی) کی طرف جاتے ہیں جو ہمیں ہمیشہ صحیح ثابت کرتی ہے۔
حرا ترین نے نشاندہی کی کہ آج کل لوگ ایسا مواد مسلسل دیکھ اور سن رہے ہیں جو انہیں یہ یقین دلاتا ہے کہ تنہا رہنا بہتر ہے اور دوسرے تمام لوگ نقصان دہ ہیں۔
انہوں نے واضح کیا کہ وہ یہ نہیں کہہ رہیں کہ یہی سب کچھ عائشہ خان اور حمیرا اصغر کے ساتھ ہوا، بلکہ وہ صرف یہ یاددہانی کرا رہی ہیں کہ ہمارا معاشرہ کس خطرناک سمت میں جا رہا ہے، جہاں لوگ ایک دوسرے سے کٹ کر تنہائی کا شکار ہو رہے ہیں۔
آخر میں انہوں نے اداکارہ حمیرا اصغر اور عائشہ خان کی مغفرت کے لیے دعا بھی کی۔
خیال رہے کہ اداکارہ حمیرا اصغر کی موت کے بعد متعدد مشہور شخصیات نے سوشل میڈیا پر لوگوں سے اپیل کی ہے کہ وہ اپنے دوستوں، جاننے والوں اور ان لوگوں کا بھی حال پوچھیں جو کبھی خود آگے بڑھ کر مدد نہیں مانگتے اور جہاں بھی کسی کو کسی بھی طرح کی مدد درکار ہو، اس کی مدد ضرور کریں۔