لاس اینجلس (آئی این پی) ہالی ووڈ کے آئیکون اداکار بریڈ پٹ کا کہنا ہے کہ انجلینا جولی سے طلاق کے عمل کے بعد وہ اب سکون میں ہیں۔ایک حالیہ انٹرویو میں بریڈ پٹ نے اپنی ازدواجی زندگی کے اختتام پر پہلی بار کھل کر بات کی اور ساتھ ہی میڈیا میں اپنی ذاتی زندگی کے چرچے کو پریشانی کا سبب بھی قرار دیا۔
انٹرویو میں بریڈ پٹ کا کہنا تھا کہ میری ذاتی زندگی ہمیشہ خبروں کی زینت رہی ہے، میری ذاتی زندگی کا کوئی نہ کوئی رخ ایسا رہا ہے جس سے مجھے پریشانی کا سامنا رہا ہے۔ان کا مزید کہنا تھا کہ ذاتی زندگی کے مسائل کی وجہ سے ان کے پیشہ ورانہ کام میں خلل پڑا ہے، طلاق کے مسائل سے نکلنے کے بعد اب زندگی کافی متوازن محسوس ہورہی ہے۔
بریڈ پٹ کا یہ بھی کہنا تھا کہ ان کی طلاق اتنی بڑی بات نہیں تھی ، یہ بس ایک قانونی عمل تھا جو مکمل ہوا ہے اور اس طرح انہیں ایک جھنجٹ سے آزادی مل گئی ہے۔