اسلام آباد (ڈیلی پاکستان آن لائن) وزارت اقتصادی امور نے بیرونی فنڈنگ کی رپورٹ جاری کردی ہے، جس میں کہا گیا ہے کہ گزشتہ مالی سال 25-2024 کے دوران 12 ارب 14کروڑ ڈالرز موصول ہوئے، جبکہ آئی ایم ایف کی 2 اقساط کے 2 ارب ڈالرز سے زائد ملاکر فنانسنگ 14 ارب 14 کروڑ ڈالرز بنتی ہے۔
رپورٹ کے مطابق وفاقی حکومت نے گزشتہ مالی سال 25-2024 کے دوران 19 ارب 39 کروڑ ڈالرز کی بیرونی فنانسنگ کا تخمینہ لگایا تھا جبکہ اس سے پچھلےسال (مالی سال24-2023) کےدوران بیرونی فنڈنگ کاحجم 9 ارب 81 کروڑ ڈالرز رہا تھا۔ رپورٹ میں کہا گیا ہے کہ جون 2025 میں 5 ارب 25 کروڑ ڈالرز کی غیرملکی فنانسنگ حاصل ہوئی، جبکہ گزشتہ مالی سال 11 ارب 92 کروڑ ڈالرز کا غیرملکی قرضہ لیا گیا۔
رپورٹ کے مطابق مالی سال میں 22 کروڑ ڈالرزکی گرانٹس موصول ہوئیں، تاہم وزارت اقتصادی امور نے رپورٹ میں سعودی عرب، متحدہ عرب امارات (یو اے ای)، چین کے رول اوورکو حصہ نہیں بنایا۔ اسی طرح گزشتہ مالی سال کی فنڈنگ میں سعودی عرب کے 5 ارب ڈالرز کا ڈیپازٹ بھی شامل نہیں۔ رپورٹ کے مطابق گزشتہ مالی سال کے دوران فنڈنگ میں چین سے 4 ارب ڈالرز کا سیف ڈیپازٹ بھی شامل نہیں کیا گیا۔
واضح رہے کہ مالی سال 2025 کے دوران سعودی عرب اور چین سے 9 ارب ڈالرز ڈپازٹ کا تخمینہ لگایا گیا تھا۔